কেঞা পুখুৰীৰ ভূত

“গ্ৰেজিং”, মাজত চাৰিটা মান দুপনি পুখুৰি থকা বিশাল চৰণীয়া পথাৰ, দেউতাহঁত তেতিয়া এম ই স্কুলৰ ছাত্ৰ, গৰখীয়া দলটোত মুঠ আঠ-ন জন মান ল’ৰা, দুজনী ছোৱালী সুৱৰ্ণ এপা* আৰু পখিটি পেহী। চেতিয়া-দুৱৰা চুবুৰিৰ ল’ৰা ছোৱালী, ক্লাছ চেভেনত পঢ়া সুৱৰ্ণ এপা আৰু মেৰকণ নিচাই** গৰখীয়া দলৰ সকলোতকৈ ডাঙৰ।  গৰমৰ বন্ধৰ কেইদিনত গৰু চৰাবলৈ যোৱাতো দেউতাহঁতৰ বাবে বাধ্যতামূলক আছিল অৱশ্যে সেইয়া তেওঁলোকৰ বাবে আনন্দৰ বিষয়হে আছিল, প্ৰতিদিনে দুপৰীয়া বনভোজ টাংগুটি, গোলা খেলৰ প্ৰতিযোগিতা, আম-কঠাল, ডুমৰ ডুবিৰ মাছ আৰু কত যে কি। আমাৰ ঘৰৰ চাৰিটা আৰু মেৰকণ নিচাহঁতৰ তিনিটা ম’হ আৰু প্ৰায় বিছ পশিছটা মান গৰু তেওঁলোকৰ দায়িত্বত।

গ্ৰেজিং আমাৰ গাওঁৰ পৰা প্ৰায় এক কি.মি. দূৰত, ধলপুৰলৈ যোৱা যেনেতেনে চাইকেল মাৰি যাব পৰা লুংলুঙীয়া বাট এটাৰে ই আমাৰ গাওঁৰ লগত সংযুক্ত, জয়াল ৰাস্তাটোত দিনটো মানুহে অকলে যাবলৈ ভয় কৰে, তাতে তেতিয়া এনেবোৰ ঠাইত দিন দুপৰতে বাঘ ওলাই, গ্ৰেজিং আৰু আমাৰ গাওঁৰ ঠিক মাজবাটতে কেঞা ভেটি পুখুৰী, কেঞাভেটি নামটো শুনিলেই একেবাৰে খামি ডাঠ জনৰো সাহস অলপ স্তিমিত হৈ পৰিছিল, কেঞাভেটি যেন আমাৰ অঞ্চলৰ ভূতৰ কেন্দ্ৰস্থল আছিল, চাইকেল লৈ ৰাতি সেই পথৰে ধলপুৰলৈ যোৱা বাটৰুৱাক কিমান বাৰ কেঞাভেটিৰ ভূতে ত্ৰাহি মধুসুধন সোঁৱৰাইছে তাৰ হিচাপ নাই। ককাহঁত সৰু হৈ থাকোঁতে বোলে সেই ঠাইত থকা পুখুৰীটোৰ পাৰত হাৰিয়ানাৰ পৰা বেপাৰ কৰিবলৈ অহা এঘৰ কেঞা মানুহে ঘৰ পাতিছিলহি, কিছুদিন ঠিকেই থকাৰ পাছত বোলে আৰম্ভ হৈছিল ভূতৰ তাণ্ডৱ, দিনতেই মানুহৰ গালৈ শেল মাৰি পঠিয়াই পুখুৰীৰ মাজৰ পৰা কোনোবাই, কাণৰ কাষেদি, চকুৰ আগেদি শেল পাৰ হৈ, ঘৰৰ বেৰত ফুটা কৰি ওলাই যায়, গাত কিন্তু কেতিয়াও নালাগে, ৰাতি কেতিয়া হঠাতে ঘৰত ধাৰাসাৰ শিলাবৃষ্টি হয় বাহিৰলৈ ওলাই গ’লে পিছে শেলো নাপায়, শিলো নাপায়, বেৰত পিছে শেলৰ ফুটাবোৰ থাকি যায়, ভয়াৰ্ত্ত কেঞা পৰিয়ালটোৱে কিছুদিন পাছত প্ৰাণৰ মমতাত ঘৰ এৰি পলাল। তেতিয়াৰ পৰাই পুখুৰীটোৰ নাম কেঞা ভেটি হ’ল, ঠাইখিনিত ভূতৰ প্ৰকোপো হেনো তেতিয়াৰ পৰাই বেছি হ’ল, লগতে আকৌ বাঘ-ভালুকৰো ঘাটি আছিল এই কেঞা ভেটি। সন্ধিয়া হোৱাৰ পাছত যিমান সাহিয়াল হ’লেও কোনেও অকলে সেইফালে নোযোৱা হ’ল।

 গ্ৰেজিঙ পাৰ হৈ কমলপুৰ, সেইসময়ত কমলপুৰত দুই তিনিঘৰমান মানুহে আছিল, দেউতাহঁত পাৰ হৈ আহোঁতে কমলপুৰৰ মানুহ কেইঘৰৰ মানুহ বোৰ চাকি বন্তি জ্বলাই ঘৰৰ ভিতৰ সোমাইছে, কমলপুৰ পাৰ হৈয়েই ডাঠ হাবি, একেবাৰে ঘৰৰ ওচৰ পোৱালৈকে মুকলি ঠাই আৰু প্ৰায় নায়েই, মাজত কেঞা ভেটি, কোনেও কাকো একো কোৱা নাই যদিও সকলোৱে বুজিছে যে সকলোৱে ভয় খাইছে, দুটামান ম’হৰ পিঠিত উঠি গৈছে, দেউতাও, বাকী বোৰে গৰুবোৰৰ মাজে মাজে খোজ দিছে, কিবা কিবি কথা পাতি ল’ৰাকেইটাই পৰিবেশটো যিমান পাৰি পাতল কৰিবলৈ বিচাৰিছে, ছোৱালী কেইজনীৰ বহুত আগৰ পৰাই মাত বোল বন্ধ হৈছে, যিমানে কেঞা ভেটিৰ ওচৰ চাপিছে সিমানে ল’ৰা কেইটাৰো মাতবোৰ ক্ৰমাত কমি আহিল, গৰুবোৰক কাষত লৈ সিহঁত যিমান পাৰি সিমান ওচৰা উচৰিকৈ আহিবলৈ ধৰিল,  পুখুৰীৰ পাৰ পায় মানে কাৰো মুখত একো মাত নোহোৱা হ’ল, সোঁৱে বাওঁৱে কেনিও নোচোৱাকৈ সকলোৱে পুখুৰীটো পাৰ হ’বলৈ খৰকৈ আগবাঢ়িছে, ঠিক তেনেকুৱা সময়তে ম’হৰ পিঠিত উঠি থকা দেউতাই উচাহেৰে কৈ উঠিল সৌৱা বত্তা (আমাৰ ফালে ককাকক বত্তা বুলিও কোৱা হয়, দেউতাৰ বত্তাক মানে আমাৰ আজোককা) ৰৈ আছে পুখুৰীৰ সিপাৰে, ইমান পৰে ভয়ত মাতবোল নোহোৱা ল’ৰা ছোৱালী কেইটাৰ মুখলৈ পানী আহিল, সকলোৱে তত্‍ক্ষণাত কথা ক’ব পৰাকৈ পুনৰ শক্তিশালী হৈ  উঠিল, সকলোৱে দেখিলে আজোককা পুখুৰীৰ পথৰ দাঁতিত পুখুৰীটোৰ আনটো পাৰত দেউতাহঁতলৈ চাই ৰৈ আছে, জোনৰ পোহৰত বত্তাৰ পাগুৰিটো জিলিকি আছে, ইমান দেৰি হোৱাৰ বাবে চাগৈ দেউতাহঁতক বিচাৰি আগবাঢ়ি আহিল। দেউতাহঁত খৰ খেদাকৈ তেওঁৰ ফালে আগবাঢ়ি গ’ল, অলপ আগতে ভয়ত খোজ কাঢ়িবলৈ প্ৰায় শক্তিহীন হৈ পৰা ছোৱালী দুজনীও বেগাই খোজ কাঢ়িব পৰা হৈ উঠিল, হঠাত্‍ জানো কি হ’ল পুখুৰীৰ মাজ মান পাওঁতেই ইমান পৰে শান্ত ভাবে আহি থকা গৰু ম’হ কেইটাই ইফালে সিফালে যাবলৈ ধৰিলে, ল’ৰা কেইটাই সিহঁতক চম্ভালিবলৈ চেষ্টা কৰি থাকোঁতেই আচল ঘটনাটো ঘটিল, দেউতাহঁতলৈ পুখুৰীৰ সিপাৰে ৰৈ থকা বত্তা দেখোন লাহে লাহে পুখুৰীৰ পানীৰ ফালে নামি গৈছে দেউতাহঁত যিমানে তেওঁৰ ওচৰ পাইছে সিমানেই তেওঁ পুখুৰীৰ গভীৰলৈ নামি গৈছে আছে, আৰু চকুৰ আগতে কেঞা পুখুৰীৰ পানীত পাগুৰি মৰা বত্তা বতাহৰ দৰেই ক’ত হেৰাই পৰিল কোনেও টলকিব‍ই নোৱাৰিলে, বত্তাৰ ফালে আগবাধই গৈ থকা ল’ৰা ছোৱালী কেইটা এতিয়া কোনফালে যাব থিৰাং কৰিব নোৱৰা হ’ল, ছোৱালী কেইজনীয়ে ভয়ত ল’ৰা কেইটাক সাৱটি ধৰিলে, দেউতাই ম’হৰ পিঠিৰ পৰা কেতিয়া জাপ মাৰি নামিল ক’ব নোৱাৰে, ইতিমধ্যেই গৰু ম’হ কেইটাই পুখুৰী পাৰ হৈ ঘৰৰ ফালে দোপ দোপকৈ দৌৰি গুচি গ’ল, আটাইকেইটা ল’ৰা ছোৱালী পুখুৰীৰ পাৰতে শিল হৈ কিমান দেৰি থাকিল ক’ব নোৱাৰে, কিছু সময়ৰ কাৰণে চিন্তা কৰাৰ শক্তিবোৰ গোট মাৰি গ’ল, হঠাত্‍ কোনোবা এটাই চিঞৰি উঠিল দৌৰ দৌৰ, চকুৰে কোনেও একো নমনা হৈ আহিছে, কিবাকৈ পুখুৰীটো পাৰ হৈ ঘৰৰ ফালে যোৱা পথাৰ খনেৰে এইবাৰ আটাইবোৰ দৌৰিব লাগিল, বুকুখন আৰু ভৰিকেইটা যেন শিলতকৈ গধুৰ হৈ পৰিছে, কোনোবা এটা এবাৰ পথাৰৰ আলিত উজুটি খাই পৰিছে, কোনোমতে সি উঠি আহি লগৰ কেইটাৰ লগ লাগিছে, দৌৰি দৌৰি আহি সকলো ঘৰৰ ওচৰত থকা নামঘৰৰ পাৰৰ আলিটোত উঠিলহি দুটামান ভাগৰত আলিটোতে বাগৰি দিলে, হাতত চকুৱা লাখুটি এডাল লৈ বত্তা নামঘৰৰ বাটচ’ৰাৰ ওচৰতে ৰৈ আছিল দেউতাহঁতৰ বাবে বাট চাই,

“তহঁতৰ ইমান দেৰি কেলৈ হ’ল, বাঘৰ উত্‍পাত দেখা নাই এইকেইদিন? আৰু ইমানকৈ কেলৈ দৌৰিছহঁত?”

দেউতাহঁতে বত্তাক একো উত্তৰ নিদিলে, উশাহ বোৰৰ গতি তেতিয়াও ধীৰ হোৱাই নাছিল।

[*এপা: দেউতাৰ বায়েক বা মাৰ ককায়েক(নিচা)ৰ পত্নী, **নিচা: মাৰ ককায়েক বা দেউতাৰ বায়েক(এপা)ৰ পতি তাৰোপৰি মা দেউতাতকৈ ডাঙৰ সম্পৰ্কীয় নোহোৱা মানুহক সম্বোধন কৰিবলৈও এপা নিচা ব্যৱহাৰ কৰা হয়, ইংৰাজীৰ uncle/unty ৰ দৰে, কেঞা ভেটি পুখুৰী এতিয়াও আছে, এতিয়া কাষৰ ৰাস্তাটো এতিয়া পকী হ’ল, হ’লেও এতিয়াও কেঞা ভেটিক লৈ কাহিনীৰ এতিয়াও অন্ত নাই, এতিয়াও বহুতে কিবা কিবি দেখা বুলি কয়, সন্ধিয়া অকলে পাৰ হৈ গ’লে গাটো এনেয়ে কিবা এটাই চুই যোৱা যেন লাগে হেনো বহুতৰে। ]

মন্তব্য দিয়ক